في حضرة المسافات...كتبها الشاعر ابن الملاح

فى حضرة المسافات

كل الكلام مسموح
كل النفاق مسموح
والعيب يمل الستر
ويبان كمان بوضوح
تقولي كلام كتير فيا
وإنك كنتي تسلية
وقلبي الظالم الجاحد
وفيتي عشانه قام خانك
مفيش لو حتى يوم واحد
حماكي بحضنه أو صانك
وإنك عيشتي مخدوعة
ليالى كتيرة موجوعة
عشان قلبك لأنه نضيف
رماكي لقلب طبعه الكدب
غواكي لحد ما امتلكك
ومقدرش أنه فيكي يحب
هجر قلبك لحد ما مات

فى حضرة المسافات
قبلت كلامك الزايف
وشايفك وانتي كدابة
وعامل روحي مش شايف
عشان قلبي اللي حبك يوم
خلاص مل الرجا منك
ولو يسألني يوم عنك
هقوله انساها مش توبك
ومش ناقصك ياقلبي ذنوب
تضيفها زيادة لذنوبك
#ابن_الملاح