جوز ل اربعة... معوض، حلمي
قصيدة زجلية للفلاح الفصيح
ـــــــــ جـوز ل اربعـة ـــــــــ
شوفت محمد بيه عشماوي
ودا كان باش محضر ف بلدنا
جايب حكم سعات القاضي
إن البت حميدة براءه
وان الدوخه سببها الموزه
وان الجوزه نضيفه وعال
وان الواد عبعال براوي
حب وغاوي البت سكينه
بنت لذينه أروبه وحست
قامت رقصت دنس وسيكا
هب الواد محمود مزيكا
قال على فتوى الست ماريكا
إن الشرع محلل سبعه
وان الشمعه حرام ولعتها
عشان بتموت أي ناموسه
وان جاموسة حمدي الفرعه
لازم ترعى ورعي مساوي
لاجل الحاوي يقول أشعار
والإشعار م العمده حميده
وان صميده غفير الحته
فحل الجته بعقل حمار
جوا الدار كان وشه مبوز
كان متجوز جوز نسوان
كان متدهول على عين أهله
قام من جهله يجيب التالته
عينه الفالته قالتله عديله
بت جميله وراح على سهوه
عند القهـوه الدار معروفه
وخد منصوفه الخاطبه معاه
قالت ياااه ياصميده عليك
مد إيديك واسندني ياواد
دا انت ياواد وداد والله
والنسوان ياحبيبي دواهي
وانت كمان حيلك مقطوع
والموضوع دا تسيبك منه
قال إكمنه ف حبها طب
آخر مـره ياخـاله وبـــح
ضحكها سح وقـالت دوس
المتعوس متعوس ياضنايا
والنسوان هايسودوا عيشتك
وانت وخيبتك ويا تلاته
ده لو رضـيت وانت مخلف
اصل عديله دماغ متكلف
وانت مـولف ع المقاطـيع
سونه بديع وهبابة الطـين
رضيوا يعيشوا معاك ل اتنين
شافوا سنين زي القطران
وانت ياواد شكلك بطران
إوعى البت عديله تكيدهم
تطــــلب مـنك وتطـــلقـهم
أصل البت صغار وتلاعبك
قبل الفاس ماتشق الراس
تبقى حديت الناس يامرارك
تكتـب دارك ليـها وأرضك
شاور عقـلك واسمـع مني
حكمـة سني ياخويا دليل
بعد التالته هاتيجي الرابعه
وتبقى مرابعه عليك وتميل
وعلى رأي المثل ياجميل
(جوز لاربعه يتهد لو عنتيل)
ـــــــــــــــــــــــــــــــــــــــــــ
بقلمي الفلاح الفصيح
معـــوض حلـمي عــلي
منــــــــشأة بطـــــــاش
تمي الأمديد .. دقهلية
تعليقات
إرسال تعليق