جدبة الكلام..ل..محمد حديش

 ¤زجل¤

جَدْبًةْ الْكلامْ

~~~~~~

تْعَرَّى  بوحْ  الجًّدْبا  كْلامْ  

نَغّصْ حَرْ  ضَّغْما  تَحْيارْ

لًمْجاجْ تَنْخَضْ لاحْ السَّلْهامْ

شَرْ الوْجَهْ ¹الْقاصَحْ ²دَوَّاني

لْبَسْ ³لَمْقَزْدَرْ زْواقْ مْعَنْتَرْ     

تْنَكَّرْ لْدَمُّو ؤُباعْ الْخُّوتْ

إِمْتا تْفيقْ عْقولْ ⁴الرْڭادْ

⁵ضَبْرَتْ الصْبَرْ مْغَرْڭاراسي

الْموسْ شَقْ عْضَمْ الصْبَرْ       

ؤُحْماقْ النْهارْ بَضْلامْ زْفَرْ    

تْكالْ المْقَشًّرْ ⁶بَزْلَطْ ⁷مْشَحَّرْ

شْحالْ وَصَّلْ الْخايَنْ ⁸لَلْبَرَّاني

تْسَفَّحْ المْخَبِّي ؤُبانْ ⁹الُّبانْ    

دَوْخاتْ مْجاجْ هْبَلْ تَرْبَح

الوْكَرْ تَهْجَرْ ؤُطارْ المَزْيانْ     

تْسَيَّفْ بْنادَمْ بَوْجَهْ رُوحاني

الْحيطْ مْتَكِّي مايَلْ مَڭْعورْ

مْضَرَّك ڭَرْڭاعْ خاوي مُخْ       

تَعْمارْ  شْوارَجْ دَلْ النَّفْسْ

تَمَّا ¹⁰تْوَعَّتْ الخاطَرْ فْرَّادي   

الَّلهْفا جَرَّاتْ شْحيمَتْ الطْمَعْ   

سِيْلاتْ رْيوڭْ ؤُدَلاَّتْ الْلسانْ      

ضَبْعاتْ شَلاَّ ¹¹ڭْماڭَمْ تَرْقادْ

تْحَقَّقْ تَحْماقْ إِخَلِّيوْكْ داوي

جارْ  أَرْضَكْ  تْنَكَّرْ  مَسْعورْ   

باعَكْ غْدَرْ ¹²بَحْسيفَتْ الغْيارْ

النَّاسْ بَالأَصْلْ تَعْرَفْ جْدَرْ     

ؤُكُلْ دْميمْ ديبْ ¹³رَعْواني

الْكَسْدا صاطْ ريحْها مْڭَيَّلْ   

شْعا القْرانَبْ¹⁴ طُكَكْ شانَتْ¹⁵     

التَّاعَسْ لْبَسْ خيشْ قَنَّبْ

تْكَلَّمْ مْرَزَّنْ رَجْعُوهْ بوهالي

حْتَّى لينْ القَهْراتْ  تَطْحَنْ   

نَيْلاتْ الطْحينْ¹⁶قَرْجًطْ الْهَمْ

ؤُتْكالْ حْصادْ ¹⁷دْميرْ الخَمَّاسْ    

¹⁸تَسْرَطْ ناشَفْ ؤُتَعْصَرْ حًرَّاني

الله  عْليكْ  ياديكْ  الِيَّامْ    

ناسْها جْبالْ النَّخْوا وَالْجودْ    

اخْبارْهُمْ ¹⁹تْزَمَّات رْسومْ العَزْ

غَرْسو ؤُكافْحو بَصْبَرْ رْواني

بَخْيوطْ الڭَمْرا ڭَبَّصْتْ السْقَفْ  

ؤُنْقَشْتْ تاويلْ خاطَرْ  النَّفْسْ    

لْبَسْتْها  ²⁰رَزَّا  دْفَّاتْ  الرَّاسْ

بَلْوانْ عَشْقاتْ العْمَرْ الْفاني

وْجوهْ تَهْديهَمْ صْفا مْحًبْتَكْ  

يْكَرْموكْ مْكَرْ بْعَضَّةْ الحْنَشْ

ؤالوادْ ساڭْهم بالقيلْ وَالقالْ

كُلْها كامَشْ طَموعْ القَرَّاني

لله يا المْهَبًّلْني حن كْريمْ  

داوي ²¹سْخانَتْ ²²لَبْغو ؤُبَخْ

رْفَقْ مابِيا لاتْكونْ قاصَحْ

راهْ  غرامَكْ  هَيَّجْ حالي

وْتاقْ العَطْفا طَيْرو الرِّيحْ 

ؤُتْلَفٌ  تَدْواحْ  نِيَّةْ  الْبالْ

تْهَرَّسْ كاسْ مْحَبَّةْ الدَّاتْ

مَكينْ غيرْ تَصْباغْ ²³قَرْطاسي 

شَلاًّ هازْ الڭَلْبْ المْوعَّتْ   

شادْ حْبَلْ الْيقينْ عْوَّالْ

مَنِّي حَرْڭَتْ ليفاتْ تَزْهَرْ 

نْغيبْ سابَحْ مْسَّبحْ الْعالي

مَن  كْلامْ  لَكْلامْ  جَدْباتْ

تَسْڭاتْ رِيَّا رْواتْ ²⁴شَّحْفاتْ

كْتَبْها سْواكَنْ عَشْقْ الْحَرْفْ

وْفا صادَقْ عْطِيَّتْ الْهادي

ب͠ق͠ل͠م͠ م͠ح͠م͠د͠ ح͠د͠ي͠ش͠ 

       م͠.ج͠.ح͠

2020\10\20

**{شرح أدبي مختصر لبعض الكلمات} :

 ¹القاصح أي الصلب▪︎²دواني أي كلمني▪︎³المقزدر أي الوقح▪︎⁴الرڭاد أي الرقاد▪︎⁵ضبرت أي جرح محتك▪︎⁶بزلط أي بفقر▪︎⁷مشحر أي مستوي على النار▪︎⁸البراني أي الغريب أو الأجنبي▪︎⁹البان نوع من الحلي▪︎¹⁰توعت أي تألم▪︎¹¹ڭماڭم أي جماجم▪︎¹²بحسيفت▪︎أي بخديعة▪︎¹³رعواني أي جبان▪︎¹⁴القرانب أي كثرة الكلام▪︎¹⁵شانت أي متعجرف▪︎¹⁶قرجط أي خنق▪︎¹⁷دمير أي العمل المتعب▪︎¹⁸تسرط أي أبتلع▪︎¹⁹تزمات أي كتبت▪︎²⁰رزا أي عمامة▪︎²¹سخانت أي الحمى▪︎²²لبغو أي الحب▪︎²³قرطاسي أي لامع▪︎²⁴شحفات أي جفاف