الحنين...ل..محمد بدوي
الحنين
***************
لحظه خدنى الحنين
ورجعت معاه سنين
للشوق وايا الحنين
وقلب مقسوم لأتنين
فكرنى بأيام زمان
وملامح المكان
والذكرى على الحيطان
كاتبينها من زمان
بحروف أسمى وأسمك
وقلب فيه سهم منك
مكتوب عليه بحبك
وحروف كل أسمك
حاضنه ف العشق رسمك
مكتوبه بالطباشير
على حيط مدهونه جير
ورغم مرور سنين
محصلهاش تغير
بس الزمن جارح
وع الحيط كلام واضح
باين مكتوب من أمبارح
لكن بقالوا سنين
لسه فيه النبض
واصل من الشرايين
والحروف بتحس
وكأن بنى أدمين
بايته ف عينيها دموع
على قلب كان موجوع
ولسه قايده شموع
فى سطور الذكريات
وحروف من عمر فات
تايهه من الكلمات
صعبان عليها حالى
ورجعت من خيالى
لكن معرفش مآلى
أنا يمكن نسيت قلبى
بين سطور عمرى
ورجعت من غيره
دمعى على خدى
شايل على كتفى
هم وحمل تقيل
بتحنى فى ضهرى
نسمه هواها عليل
لا ف بالى ولا أتخيل
من كلمه ع الحيطان
أرجع وأعيش ف زمان
بعد الأوان بأوان
م/محمد بدوى أبوالعلا
تعليقات
إرسال تعليق