سورية المقدسة...بقلم عازار الريم

.....  قطفة حبق.. 

شعر باللغة المحكية......

قطفة اليوم عبارة عن حبقة كاملة

           ..سورية المقدسة..

كتر ما تكدسو علينا المآسي

     صار الفرح نوع من القداسي

و صار الوطن محفوف بمخاطر

   كتر ما تشنجو رجال السياسي

و صرت مجبور بالكلمات خاطر

  ت وعي ناس غفيو عالدساسي

و اطلق مركبي من دون ياطر

   ت يعبر بحر اعلا من الرواسي

و على درب الحقيقة رحت سافر

  ت جيب نصوص تصلح للدراسي

و بفعل الظلم صفيت كافر

       ب خطة ناس زادتنا تعاسي

انتبهو للزمن و الزمن غادر

       بدو مقدرة وعلم وفراسي

و بدو مكرمة من عصر غابر

   فيها صدق مع ظرف و كياسي

و يحمل شمعة التنوير قادر

   ع شيل الداء من دون انتكاسي

و ما يبقى بموطني إنسان جائر

  و لا محروم عايش حال قاسي

تنتذكر سوا بصحوة ضمائر

        كيف بلادنا الاسما سورية

  كانت فخر من رمز القداسي.

عازار الريم سورية