بير المحبه... محمود الحريري
"بير المحبة"
------------------
بير المحبة لقيته فاضي
فسألته ليه مش مليان
وسألته إيه اللي جرالك
وليه بقيت مش زي زمان
وليه فاتوك كل حبايبك
وعَشِّشِت فيك الغربان
ولقيت دموع بَدَل المَيَّه
تحكي عن الشوق والحرمان
..........
لك ف القلوب ذكرى جميلة
أيام صبانا وشبابنا
حواليك سهرنا وغنينا
من مَيِّتَك ياما شربنا
وقضينا أجمل ليالينا
في وسط ناسنا وأحبابنا
وزرعنا جنبك كام شجرة
طرحت محبة على قلوبنا
لو يوم تعِبنا بنجري عليك
عندك يروح كل تَعَبنا
..........
ياريت يابير الخير يرجع
والمَيَّه فيك من تاني تعود
ومحبتك تملا حياتنا
والحب يفضل كده موجود
من مَيِّتَك نرجع نشرب
ونرَجَّع الأمل المفقود
يتلموا حواليك أحبابنا
ويبقى ده اليوم الموعود
-----------------------------
بقلمي؛ م/محمود الحريري
تعليقات
إرسال تعليق