اوعى تخاف... رمضان الشيخي
إوعى تخاف
...
طول ما ربك هو
اللي محاديك
ما تخافش من أي
حد يعاديك
ومهما حاول علشان
بشره يبليك
رحمة ربك حتسبق
مكره وتفاديك
...
إوعى تخاف طول
ما ربك بيحميك
مهما السهام كترت
علشان ترميك
مستحيل تصيبك
أو تقدر تدميك
حارسك ربك محدش
يقدر يشقيك
...
ومهما الناس عابوك
على طيبتك
خليك زي ما انت
وعلى طبيعتك
ما تغيرش في حاجه
من صنيعتك
مهما عملت مش حتغير
فكرهم فيك
...
العيب مش فيك
وبالتأكيد فيهم
مهما عملت معاهم
مش حتوفيهم
إدعي ربك من
أمراضهم يشفيهم
وعلى كد حسن نيتك
ليهم ربنا يديك
...
ما تشغلش بالك بيهم
ومن حقدهم سيبك
خليك مع ربك هو
وكيلك وحسيبك
مهما يعملوا ضرهم
مش حيصيبك
طول ما ربك معاك
محدش يقدر يئذيك
...
مهما حاول غريمك
لسكة الأذى يجرك
إياك تشيل الهم أو
تخاف منه يضرك
هو يقعد يمكر ليك
وربك بفرجه يسرك
وبأكتر من اللي كنت
بتحلم بيه يعطيك
...
رمضان الشيخي
تعليقات
إرسال تعليق