كان ياما كان... صونيا اسبر

 كان يا ما كان

المحبة بالقلب ما تفَرق

بين جار وقريب

كان الوصال عفوي 

من الشباك ننده للمحبين

نصَبح ونقول

القهوة ع النار ميلو

قهوة بحب الهال تتأهل فيكن

وان ما بتحبو الهال الركوة التانية 

بٍتجهز لترحب فيكن

كان يا ما كان الخيَ ما بكفي

يطمن ع اخته او خيو بالتليفون

قلبه ما بيرتاح لحتى

عضام صدره يحضنن

كان يا ما كان الاخت تحس

بالحكي انو حكيات اختها 

فيهن دموع وعنها مخباية

لحتى الوجع ما ينتقل إلها

كان يا ما كان في أنسان

وهلق صار الانسان آلة

بالكاد شغل تسع ساعات بالنهار

ما بكفو ليجيب  سترة

أربع حيطان ولقمة أكل

وبضل ماشي الحيط الحيط

ويقول سترك يا رب

ما عوز دوا ولا مشفى

كان يا ما كان أنسان بذاكرة

أهل ورفقه و عيلة وحياة

وهلق ما صار بذاكرته 

الا الدولار كيف بدو يجيبو

حتى يقول بعدني فوق الأرض

           صونيا ..اسبر

صباح الخير والنور