فراق وحنين... جرجس لفلوف

 فراق وحنين.....شعر عامي.

وين رحنا ووين راحوا رفاق هاك الزمان

إنساني يازمن عطراف ضيعتنا 

عدرب العين تحت ظل تينتنا

شباب وصبايا وجرار  ميتنا

جورج وجرجي وجوز جارتنا

حنين وحنان ومرت حنا

ضحك وغمز وحكي وحب شلتنا

إنساني يا زمن عطراف ضيعتنا 

حليب ولبن وزيت زيتون من زيتونتنا 

فطور وغدا ومن التنور خبزتنا

ضعنا وضاع العمر في كهف الحياة 

ونسينا العين ويمكن العين نسيتنا

وين رحنا ووين راح هاك الزمان

إنساني يازمن جنب هاك الدير

واتركني رتل صلاة الحب لذاك الطير

يا طير يا طاير على جنح الضباب 

بلغ سلامي للحبايب والغياب 

وقبل ما نار الشوق تشعل بالقلوب 

ارجع لعندي حاملا منهم جواب 

 بلكي بيرجعوا بعد طول غياب  

 وبترجع معن أيام الهنا والشباب

وتنطفي نار الحنين والشوق  للغياب 

جرجس لفلوف سورية