أنا... ابو رامي الاسواني
( أنــــــــا )
والله وعجزت يا واد
والعمر اهو باين على وشك
لا عيونك عادت بتشوف زين
ولا رجلك شايله معاك همك
عجزت يا واد اوعاك تنكر
وشك م الحزن كما الايام
مهموم وبانت تجاعيده
ولساك عايش ف الاوهام
مستني يطلعلك يوم عيده
والله وعجزت يا واد
وراسم عالشفه كلام كداب
لجل تداري بي عيوبك
واهو توبك هلهل والله عليك
بانت فيه كل عضامك
ماشي بتتعكز على نفسك
ولا حدش سامع لكلامك
ايامك عدت طيف دخان
ماشى عمال تتلكك
محني وضهرك فيه ميلان
ياك زى زمان فاكر نفسك
كانت ليك طله تهيب الكل
وصوت بيجلجل كالصولان
عجزت يا واد راحت منك
حتى حروف النطق كمان
طالعه منك مخنوقه
صوتك واطى قوى وبهتان
ما خلاص ايامك بتولي
حزنان ومكشر ليه تملى
خليها على الله سيبها يا واد
ربك بينزل ويعلى
ابو رامى الاسوانى
٢٠٢٢/٩/١٦
تعليقات
إرسال تعليق