دوامة....زينب سليم احمد
((( دوامة )))
الدنيا دي زى الدوامة
بتوه فينا وتتعبنا
بنآسي منها كتير ياما
والحزن بيعصر فى قلوبنا
وبنسمع فى عتاب وملامة
وبتخنق دايما في شعورنا
ولا منها مفر ولا سلامة
وبنرضي معاها بمكتوبنا
دوامة بتسرق أحلامنا
وفى ثانية تحولها كابوس
بتسفه فكرنا وكلامنا
وبتيجي علينا وبتدوس
ولا فارق جهلنا وعلامنا
ولانقص ضمير ولا فقر فلوس
دوامة الدنيا ولا بترحم
زي طاحونة وقلبها صوان
وساعات بتطبطب أو ترجم
بندوق وياها سنين حرمان
وان موتنا حتى ما تترحم
وفى آخر الليل نصبالنا صوان
ياللا تعالوا معاها نعافر
زي ما تعبتنا هنتعبها
ونفوت لها حزننا ونسافر
ونهد آذاها ونخربها
حتى لو جوع فرحها كافر
هانقاوح فيها ونغلبها
______________________
بقلم / زينب سليم أحمد
تعليقات
إرسال تعليق