زهر البيلسان...بقلم يوسف.م.شحرور

🌻🌼🌷🌹🌺........زهر البيلسان........🌺🌹🌷🌼🌻
"قصيدة بالعامية"

كنت انا والقمر هونيك سهرانين       
 نجمع فراشات وسراج الليل خجلان

القمر صار يتباهى بنورو       وانا قعدت ساكت وتخرسن اللسان

شوي حبيت اتذكر بالماضي شو صار   
وقديش بقلبي حملت اسى واحزان

وهيك سألت العمر: محبوبي وين صار     جاوبني:
تأخرت ومر عليك الزمان

كانت زغيري،وكنت حب شوفها       
 لما تروح تشتري اغراض من الدكان

كبرت،وصار الربيع ينسم ع شعراتها     
وطيور الحب تغردلها بنغمة حنان

وعند الصبح كانت تتباهى ب طلتها   
 وانا بالبيت اتخيل مشية الغزلان

وبحجة صباح الخير يا احلى جارة   
كنت اسرق نظرة من جسمها ال مليان

وبيوم جمعت حالي وشديت اعصابي   
تجرأت ورحت ع بيتها بلا استئذان

قلت ل اهلها انا منكن طالب القرب   
 وإلي الشرف صاهركن يا جيران

اتطلعت امها بحسرة وهزت راسها     
تأخرت يا ابني ع زهر البيلسان

البنت اجا نصيبها من كم شهر         
واحترنا من كتر ما اجاها عرسان

وهي،بعيون فيهن نظرة حزن     
 توردو خدودها وغطاهن الخجلان

ضربت كف بكف ووطيت راسي       
ورحت صوب الباب متل السكران

هيدي الدني كلها حظ ونصيب       
 وال إلو رزقة بيبعتها الرحمن

هيدي قصتي حكيتها يا قمر         
دخيلك نيمني بحضنك انا نعسان.

بقلمي:يوسف م.شحرور